إمتى تقرر انك تسيب شغلك وتروح مكان تانى ؟!
زمان كان ليا صديق شغال فى أحد الشركات فى قطاع المبيعات، وبما أنه اتعين فى الشركة دى بعد تخرجه مباشرة ، فكانت بالنسبة له هي الفرصة الأولي والأخيرة، وفضل شغال في الشركة دى بوظيفة مندوب مبيعات لمدة 4 سنوات متتالية، وهو بيكافح ليل نهار وبيحاول إنه يحقق إللى مطلوب منه على أكمل وجه .
لحد ما جه يوم فجأة كده وبدون سابق إنذار الشركة قررت إنها تفتح باب الترقيات لوظيفة sales supervisor ( مشرف مبيعات ) وكانت الوظيفة دي بالنسبة لصديقي مؤكد هتكون من نصيبه وبشهادة أغلب زملائه.
ولكن إللى حصل حاجة تانية خالص فجأة إللى اترقي للوظيفة واحد ولا على الحسبان ولا على الخاطر، إللى اترقي شخص تانى كان من أقل الناس إنتاجية ودائماً كان عليه ملاحظات، ولكن سبحان الله الشركة شافت إنه الشخص المناسب .
صديقي طبعا فى البداية حس إنه اتظلم وإنه كان أحق بالترقية ووقتها كنا قاعدين أنا وهو على القهوة وهو متضايق جدآ، وبيقولي إنه عمره ما قصر فى شغله ودائماً كان بيحقق أهدافه وعنده علاقات قوية جدآ مع عملائه ومع مدرائه.
وقتها قلت له معلش أكيد الترقية دي مش نصيبك وكانت نصيحتي له إنه يصبر ويشتغل اكتر ويفضل يجتهد ومؤكد ربنا هيعوضه .
سمع كلامي وقالي عندك حق طالما أنا بسعي وبجتهد والترقية ماجتليش يبقى فعلاً مش نصيبي وقال "الحمد لله على كل شئ"
وبدأ يعيش حياته طبيعي جدآ ومرت سنه كمان عليه وهو شغال فى نفس المكان ووقتها كنت أنا سافرت وكانت وسيلة الإتصال دائمآ بنا عن طريق ال Facebook وفى أحد المكالمات بنا قالي شفت إللى حصل فى الشركة عندنا، رديت قلت له خير إيه إللى حصل ! !
قالي الشركة جابت مشرفين من بره الشركة واديتهم رواتب أعلى بكتير من المشرفين اللى موجودين, وكمان كان فى واحد معنا فى الشركة له اكتر من 10 سنين معاهم عمل حادثة بالعربية واتحجز فى المستشفى اكتر من شهر لحد ما مات ولا فكروا حتى يزوره ولا يدعموا مادياً أو معنوياً .
بصراحة بعد ما سمعت منه قلت له وأنت ناوي على ايه قالى بصراحة يا كريم أنا خايف اسيب الشركة أنت عارف المسئوليات والظروف إللى الواحد فيها ومش عارف أعمل إيه ؟
رديت عليه بكل وضوح فى جملة واحدة قلت له :-
" اطلع من المياه الراكدة "
ووقتها كانت الشركة إللى أنا شغال فيها كانت طالبة ناس تسافر تشتغل وحطيت إسمه فى قائمة المقابلات وبلغته بالميعاد وهو كان متردد جدآ وخايف إنه يسيب الشغل ويروح للمجهول وقتها قلت له يا صاحبي الشركة إللى أنت فيها مش هتتقدم فيها خطوة واحدة
قالي أنا معاك بس مش معني كده انى اجازف واسافر أو اسيب الشغل
قلت له تجازف وتسافر ولا تفضل طول حياتك عايش على أمل وأنت فى الأصل مش متشاف
وقتها قلت له كمان قرار إنك تسيب الشغل ده معاك إنه مش سهل ولكن.....
👈لما تكون شغال فى مكان ومحدش شايفك ولا معترف بشغلك يبقي القرار ده مفيش اسهل منه.
👈لما تكون شغال فى شركة مش بتراعي ظروف موظفيها ولا بتقف معاهم فى المحن يبقي قرار انك تسيب الشغل ده مفيش اسهل منه
👈لما تكون شغال فى شركة مفيهاش سلم واضح للرواتب أو الترقيات وبتعتمد على مبدأ أهل الثقه مش اهل الكفاءة يبقى المكان ده مش بتاعك .
اطلع من المياه الراكدة وخلي عندك يقين ان الرزق مش هيجيلك وانت مش بتسعي ولا بتحاول وطالما انت حاولت فى المكان إللى انت فيه والنتيجة صفر يبقى المكان ده مش بتاعك يا صاحبي
وسافر صاحبي ولكن على شركة تانية غير شركتي وهو دلوقتى مدير كبير فى شركته الجديدة وحقق حاجات لو كان فضل فى المكان القديم عمره ما كان هيحققها
علشان كده لازم تكون عارف امتى تقرر تسيب الشغل وتروح مكان تانى لان الفرص بتيجي دائمآ للشخص المستعد لها واللى بياخد بالأسباب
👈 وفي الختام يا تري ايه الوقت اللى قررت فيه إنك تسيب شغلك وما ندمت عليه وايه السبب اللى خلاك تفكر فى إنك تسيب شغلك
تحياتي
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات